2 avqust 2025-ci il tarixində Həvəskar Astronomlar Cəmiyyəti tərəfindən Şamaxı Astrofizika Rəsədxanasında keçirilən ictimai AstroCamp uğurla baş tutdu.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən dəstəklənən “Azərbaycanda Astronomiya Təhsilinin Təşviqi” layihəsi çərçivəsində növbəti tədbir — gecəlik ictimai astro-düşərgə (AstroCamp) 2 avqust axşamı başlayaraq 3 avqust səhərinə qədər ölkəmizin aparıcı elmi mərkəzlərindən biri olan Şamaxı Astrofizika Rəsədxanasında təşkil olundu.
Tədbir çərçivəsində iştirakçılar üçün müxtəlif istiqamətli fəaliyyətlər həyata keçirildi. Axşam saatlarında rəsədxananın astronomiya muzeyinə ekskursiya təşkil olundu və iştirakçılar kainatın öyrənilməsi tarixini əks etdirən ekspozisiyalarla tanış oldular. Ardınca üç əsas mövzuda maarifləndirici ustad dərsləri keçirildi:
- Teleskoplardan istifadə və səma müşahidələrinin əsasları;
- Peşəkar astrofotografiya — texnika və proseslərin əsas mərhələləri;
- Mobil telefonlarla astrofoto çəkmə üsulları və praktik tətbiq.
Gecə saatlarında isə iştirakçılar üçün interaktiv intellektual oyun keçirildi. Oyunun sualları əsasən astronomiya, kosmos və kainatla bağlı mövzulardan ibarət idi. Bununla yanaşı, gecə boyu səma müşahidələri aparıldı, müxtəlif səma cisimləri haqqında müzakirələr və elmi diskussiyalar təşkil olundu.
AstroCamp, astronomiya elminə marağın artırılması, elmi biliklərin kütləviləşdirilməsi və cəmiyyətin astronomiya ilə canlı təmasda olması baxımından əhəmiyyətli bir platforma rolunu oynadı. Tədbir layihənin əsas məqsədlərinə uyğun şəkildə icra olundu və iştirakçılar tərəfindən böyük maraq və müsbət rəy aldı.
